ثقافات              طلاسم ثورية محمد الكندي 2019-11-29 قراءات: 164 يا زمرة الطغيان هذا حاصل الصطعش قدمتوا الوطن قربان و محمول بنَعَش للوجوه الصفرة تشافيه بالحل الدغش راح الظلم راح لو توة هالعهد چن بِلَش متونس الشيطان متربع عدنا و فُرَش سوالة خيمة و گال آنة أروي العطش و الشعب ملچوم جر النفس و انتعش ما مشى شبرين الا و طاح و ما رمش و گبل گلنا خلصنا مات اللي بينا بُطَش و اجة عهد الخيرات لچن ها بيّن غَبَش تاليها حسافة اللي خُمش و اللي نِهَش و اللي على اهلة كبر و اللي رد أنْنِفَش و احنا هم بينا الذيب و هم بينا حَنَش و حتى الگعد سكتة هم تالي و انخُمَش عاف الغلط بجبين الاجيال خط انْنِقَش و الحاصل ونين و مرن شكم صطعش ..................................................................... نوبات أگولن لا مو بدينا احنا كل اللي جرة دمنا الما وگف نزفة و كلمن اجة گال اهدرة طعم الخراب بكل نَفِس و عروگنا المبتّرة البطون الجاعت لچن باتوا شلون ما يندرة اليتامى الظلوا سنين بعازة الوالي المفخرة و الارامل بِذلة مشوا للما يسوة لزموا سِرة و الشباب شگد حلم و احلامة صارن ورة و المبدع للاسف مخنوگ و افكارة مكتّرة بس الذيب بمرح يسرح وسط هالمجزرة نوبات اگولن مو بدينا لچن خُطة محضّرة و نوبات أرِد اگولن ثقْ بدينا ذَنَّي جُلْهِن ترة و بلحظة صدگ نعترف بالغلط و نحاصرة عبّارة الموصل لساها عالشاطي مزنجرة تشهد علينا احنا بحگ الاجسام المطشّرة و المجرم اللي قتل صايغ من عدنة ترة و الغُلُب من صار مبدأنا وگفنا عليه سرة  الشارع للگُوِي و ينباع الرصيف و ينشرة لا صحينا و لا گلنا لوين بينا هالجَرجَرة و لو بينا بخت نتحاسب و الحال نغيرة كم مرتشي بنُصنا نايم نحترمة و نوقرة و للعايل شكثر صفگنا و للشريف نكدّرة اجيال هالتاهت و شور الحصاد و مَجْمَرة و لمّة چلاب مشتْ تعوي بعشگ حيدرة و چكليتة تشفي كون چنها دائرة بيطرة و اللي انتخى يگرب ابوه للقرد يعبد ثرى يمسخ الانسان و يحولة بس طَرِگ مقذرة و بِسم السوالف الزاهية منيّمة و مخدّرة يطويه بحچاية چذب خدّاعة و مشذّرة و بين هذا و ذاك الدرب صُفت بالتراب مَغبُّرة و شرايد عجب اكثر بعد من هاي المسخرة ؟ ناس تلهم ناس و الارحام مبتورة و موذّرة لا رحمة البقت بينا و بس العيون مخنزرة ارواح كالجلمود ظلت صبخة و مصَحِّرة و لا واحد يگلي شهالقساوة و شهالثرثرة و طننا يضيع بُعُدْ شبرين ترة عنّا المجزرة اليوم لازم نتحاسب و ريت الحساب نكثرة يمكن لن نگعد الباچر و النار بثيابنا مَسعّرة ............................................................................ چنت اسمع قصص اخر وكت هرج و مرج ناس فوگ ناس تطيح لحد ما يمرنا الفرج بانهار الدما تطفح شوارع مبدأ يصير و نهج شنو الغلط منو العدل منين النار اللي توِج ؟ فوضى اشما تدير انت العين غرب و شَرِج ناس بلا وجوه و لا اسم بالسجل يندرج يمتة وجّت النار ،و منهو هدم ذاك البرج ؟ منهو شال الامن واراه بوجه اصفر سَمِج ؟ منهو الذي زرع بينا الخوف و باگ الخَرِج ؟ احنا هدمنا المجلس الزاهي يبرِج بَرِج ؟ لو زحف لينا الجراد علينا سايگهم عِلِج ؟ اشما نبذر بهالگاع مشؤوم بخت الحَرِج هل بينا لولة يا وكت و الضيم دومة يلِج ؟ لو آنة من كل كتر معيوب و الخاين يلِج ؟ جاوبني يا وكت طالت يمتة الصبح ينبلج ؟ و الليل يجمع ازلامة بهيدة على فد سرج هل نگول القاضي خاين چا هذا الصدج ؟ احنا اللي غزلنا الفخ لحد ما خنگنا النسج ؟ و صرنا لصنم طيشنا الخادع نروح و نحج ؟ غرتنا دنيانا و الحاصل ضيم هموم و حَلِج ؟ احنا اللي نحود النار لثوبنا و تالي نِهِج ؟ و ندور بلا عگل من زود الضيم و نضِج ؟ لو هدمتنا الزوابع و الدرب اصبح زَلِج ؟ و انترس وجه السما رماح تگطع وِدِج ؟ يمتة تسري يا تالي فيوض الامل بالعِرِج ؟ تجينا بلهفة العطشان تلهج بسمنا لهِج و تبدل مواسم الضيم و عالظالم تعِج تعلم اللي تبع ابليس مشى درب العوِج ان چان حاكم و محكوم مشؤوم النهج لا جيب الينترس و لا زاد اليشبع حلج تگاطروا من كل كتر و الشامت مبتهج و العاگل بنص الخلگ مچتف بلا وهج محمد الكندي التعليقات الاسم * البريد الالكتروني تعليق * 5000