..... 
....
......
مواضيع تستحق وقفة 
.
.
.
رفيف الفارس
.......

 
ـــــــــــــــ
.
.
 svenska
.
مؤسسة آمنة لرعاية الايتام

.

.

..............
 
.
 ................... 


 

....................
جمعية الصداقة العراقية السويدية 
...................

  

ملف مهرجان
النور السابع

 .....................

فيلم عن
د عبد الرضا علي

  




................


خدمات ترجمة 
 في مؤسسة النور

.

 ملف

مهرجان
النور السادس

.

 ملف

مهرجان
النور الخامس

.

تغطية قناة آشور
الفضائية

.

تغطية قناة الفيحاء
في
الناصرية
وسوق الشيوخ
والاهوار

.

تغطية قناة الديار
الفضائية
 

تغطية
الفضائية السومرية

تغطية
قناة الفيحاء في بابل 

ملف مهرجان
النور الرابع للابداع

.

صور من
مهرجان النور الرابع 
 

.

تغطية قناة
الرشيد الفضائية
لمهرجان النور
الرابع للابداع

.

تغطية قناة
آشور الفضائية
لمهرجان النور
الرابع للابداع

 

تغطية قناة
الفيحاء
لمهرجان النور
في بابل

 

ملف مهرجان
النور

الثالث للابداع
2008

ملف
مهرجان النور
الثاني للابداع
 

            


سويلفات استرالية ..!

أحمد الياسري

اليوم اشوية ارد اسولف وياكم بالانكلريزي بعد تدرون احنا المعدان اتطورنا وحصلنا الجنسية الاسترالية وهذاك اليوم لبسنه عكلنا ونكسنا على ربيعتنا بنيو ساوث ويلز كفرمنت حشة كدركم ..وكلنالهم خايبين شمالكم اطونه ابروف   ..نريد نبنيلنة طوفة بعد عمكم للمعدان اهنا بسدني ..كعدنا وي واحد استرالي  معتور تعتور صماخة تكول ثلاجة مال موطة ..كال نو بروبلن  وات يو وونت ؟؟ كناله خايب وحياة ابوك كلشي ما نريد نريدلنه كًــويعة نبني عليها مضيف ..وجم جاموسة وجم مطي ..والجواميس والمطايا تارسة استراليا يمستر !!  ناخين الله وناخينك تدير بالك علينه ,,لأن احنا المعدان مرعدتنا الكفرمنتات(يعني الحكومات ) مويلاتنا وشردونه بدارك نايت (يعني ليلة ظلمه ) وخلونه نسرح بالهوش باستراليا وبعدنا ما خالصين ..لسدني ويركضون ورانه همه كلما جالهم تكثر كراسيهم ..واحنا كل ما جالنا تقل هويشاتنا  ..كال نو بروبلن ..ويت اند وي ويل كول يو باك ..نفضنا عبينا وطلعنا من يم المستر كلشي ماكو خصوصا والمستر طلع من حزب العمال وعيش يحمار لمن يجيك الربيع .!!

فكعدنا اني وصويحبي المعيدي بالشارع فرشنا عبينا ولفينالنه جكارتين لف ..وظلينة انسولف هالسويلفات مال المعدان مادام منتظرين الكفرمنت بقيادة اللايبر بارتي (من دبش ) يسوونه جارة ونلم اربيعتنا بمضيف نسولف بيه احسن من كعدة الشوارع البزعت ارواحنا منها ..وصويحبي كالي خوية ايم نوت اولرايت انت سولف اليوم فبديت بأول سالفة استرالية  ......... 

 

(( الدولار الاسترالي يهبط الى ادنى مستوياته .....  طبة مرض !!)

-- خوية علكت علكًة هاليومين بالصحف الاسترالية  بالانجاز الي حققته حكومة العمال الله  يطيها العافية ..ويوكع صبغها  على هبوط الدولار الاسترالي وشي تكول انتكاسة ،،وشي تكول تحول اقتصادي خطير ،،وشي وشي ،،لمن انثولنه ثول وكلشي ما مفتهمين من السالفة ..خوية عليمن كالبين الدنيا هسه اذا هبط الدولار لو صعد ؟؟ احنا شقابضين يبعد عمكم هو احنا الدولار من يوم اجت حكومة العمال المجيدة بقيادة بطل الامة العربية (كيفن رود ) ابو اربع عيون   افتهمنا منة  شي ؟؟  اذا طاسة الروبة صارت بالف دولار ..وجدر التمن والمرك صار باربع تالاف  !!

 هذاك اليوم عليوي ابني كالي داد  كف مي ماني (يعني اطيني فلوس ) عود اني هم صرت خواردة ونفخت روحي وشلتلة خمس دولارات حطيت بيدة ــ وكتله يبوية عود خلي الباقي لباجر ،،جان يكولي داد وات يو توكن اباوت ..كتله انه اغلام ابوي ..ليش ولك يعليوي ؟؟ كال ا ي كانت باي نو ثنك وذ ذيس ماني ( والترجمه يعني ما اكدر اشتري حريشي بفلوسك يبوية ) ..كتله يابوية جا خل يولن عوفهن شلك بالفلوس اذا خمس دولارا ت وانته بعدك هاطولك وما يفيدنك شطيك يابوية وثانيا اني عطال بطال خرفة الله على اعمامك بالسوشل سكيورتي ساترين عليه  ..هذا الحجي والدولار جان شوية عن الدولار الامريكي زين مابالك هسه راح يصير نص دولار امريكي فاذا نزل بعد الدولار ما اكول غير طبه مرض خل ينزل ...ّ!

 

ايفان شاب عراقي القوشي  يحصل على ميدالية بطولة استراليا بالكارتيه ...(عفية رفعت روس اهلك ..!)

_طبعا هذاك اليوم بالصدفة دخلت على موقع عين كاوه ،وقريت هذا الخبر والحقيقة جلب انتباهي الخبر وكيفت الحجي بيناتنا وكًلت لازم اكتب عن هذا الوليد تركت تعليق وعفت ايميلي ولله ثاني يوم اتصل بيه ايفان فعرفت انه شاب القوشي بملبورن ،،عنده عزيمة عراقية حب يمارس هوايته بلعب الكارتية ففاز بالميدالية الذهبية ببطولة استراليا ورفع راس اهله وكل العراقيين ،،الي اريد اكوله اتمنى البرلمان العراقي يقره هذا الخبر كًبل لا يصوت على الغاء المادة خمسين المتلعقة بالمكونات الصغيرة ويشوف هذا الشاب العراقي المسيحي الالقوشي اذا سألوه بعد يومين الاستراليين وكًالولة باعتبارك رفعت راس اهلك العراقيين باستراليا ..شسوتلك الدولة العراقية ؟؟شيكوللهم اخذت خقوقي وحقوق اهلي وطائفتي وسرحتني بالكًنافذ !! جا هوة هذا الجزة يا دولتنا الرشيدة ؟  اليبوكون العراق ويحركونه تكرموهم واليرفعون اسم العراق بالمحافل الدولية تمردوهم مرد ..وياريت واحد يودي خبر صعود نادي سريانيسكا السرياني العراقي الى الدرجة الاولى بالدوري السويدي ..ذولة الناس مو رفعة راس ويخلونك تفتخر بانتمائك للعراق اولا ادعوا شبابنا الظالين يفترون ورة الحديثات وكل واحد مسويلة بكلة جنها ذيل طلي ..ويتعلمون من ايفان ..وايفان اوجهلة رسالة واكوله يابعد عمك مادام اخذت بطولة بالكارتيه ما تنزل على البرلمان العراقي وتبلش بيهم دفرات وتاخذ حيف كًلوبنا منهم مو ورموا اكلوبنا ..عفية بعد عمك رفعت راس اهلك وعلي ..

تهاني غير المسلمين لعمود طك بطك بالعيد ,,! ( انته كويظم لو موش انته!!) __طبعا احب اشكر كل الاخوة الي اتصلوا بية وهنوني بالعيد لو ارسلولي بطاقات عيد من قراء عمود طك بطك ،،عمود الفقراء والمعدان في سدني وبالاخص الاخوة غير المسلمين والحقيقة عاجز عن شكرهم والله يقدرني فد يوم واكتب عن كل شخص منهم مقالة ،،لأن ذولة الناس يسوولك واهس للكتابة بس اكو ناس يخلوك ودك تشك هدومك وتشرد ..واذكر على سبيل الحصر العزيز ابو نرسي وام نرسي المخرج جان ياقو الشاعر بشار حنا الممثل جورج سليفو والكثير الكثير الي اعتذر عن ذكرهم لضيق المجال بس غالبية القراء الي اتصلوا كانوا من الاخوة المندائيين ..وبالاخص العزيز كاظم المندائي الي اوجهله تحية شكر ولعائلته الكريمه  وسالفتي وي هذا الزلمة الي اتعرفت عليه عن طريق مقالة من مقالات طك بطك ..وصار اخ من اخوتي دائما هو وعائلته الكريمه يتواصلون ويانه واذكر فد يوم اتصل ما لكاني فطلعتله ام عليوي كالتله شكول لاحمد من  يرجع كالها كوليله كاظم الصبي يسلم عليك ..فهاي داخت شلون كاظم وشلون صبي ؟؟من اجيت كالت اكلك احمد اكو واحد اتصل بيك يكول اني كاظم الصبي !! هاي اشلون ترهم ؟؟اني هم رأسا كتلها هــا ابو جواد وشكالج  كالت خايب تعال جاي شكالي شنو ؟اكو صبي اسمه كاظم ؟؟ وجانت علاقتنا ببدايتها ،، كتلها لا ماكو بس بالعراق ..كالت شلون ،، كتلها اليشرب امية دجله حتى لو هندي هم يشوف الوادم كلها اهله ،،وثانيا يم عليوي هاي لو ظاله على كويظم اخوي سهلة ولج همه شيوخ المندائية  كله كرار وعباس وحمزة وحسن ورزاق ،،وهذا دليل على التداخل بين مكونات الشعب العراقي وانه احنا اهل لا تفرقنا الاديان ولا التسميات لذلك احنا احتركنا من اتجاوزوا على حقوق المكونات الصغيرة لأن اهلنا واعتبرناه تجاوز علينه كلنا ،،فهو اليسمي اسمه باسمك شلون تلغيه وشلون تفرهد حقوقه ،،ثانيا يم عليوي انتي تدرين كاظم الصبي ليش يخابرني ومتواصل وياي لان احنا اثنيناتنا معدان من الجنوب ومايصيحلي غير ابو عليوي ،،ومن يسولف وياي يكول رجعتني لسوالف اهلي وطفولتي فياخوية يبو جويده خليلي رنة بالتلفون مالتك من اتصل بيك تدك (حميد يا مصايب الله ) حتى تعرف المتصل بيك الياسري واني راح اسويلك رنه ( انته كويظم لو موش انته ) حتى اميزك من الكواظم الي يخابروني ورنتك يصير بيها طعم يبعد اخوك وكل عام وانته بخير وانشالله من يصير عيد المندائية وتبدون التعميد تلكيني اول واحد ادبج وياكم واهوس بجورج ريفر  وانشوفكم بالعدد الجاي اذا عدلين

 

أحمد الياسري


التعليقات

الاسم: ام باقر
التاريخ: 18/06/2011 06:05:34
السلام عليكم مشكور على هلشي الحلو تحياتي لكل العائله ولااهلنا بسدني اشتاقينالها

الاسم: احمد الياسري
التاريخ: 03/10/2009 21:42:53
الحبيب جيمس الف تحية لحضرتك وشكرا لاظرائك الجميل وتأكد ان الموضوع الذي طرحته الان غاية في الاهمية ستجده منشورا قريبا في العراقية ان شاء الله وشكرا لانك رفدتني بهذه الفكرة الجميلة
اخوك الكاتب
ابو عليوي الياسري
سدني المقدسة

الاسم: جيمس
التاريخ: 03/10/2009 18:32:27
و الله يا اخوية العزيز ما اعرف شكلك
كل اربعاء انتضر الجريدة وكبل على صفحة 12 واقرة شكاتبنة هالاسبوع
بارك الله بيك و بجهودك الطيبة
يا غيرة يا ابن الغيرة
و اتمنى لو فد يوم تسوي موضع على مواقع الدردشة الي اغلب شبابنة و بناتنة صاير دينهم و ربهم الجات
يا ريت لو تقدملنة موضع بطريقتك المميزة عن الجات
تحياتي الك
جيمس




5000