..... 
....
......
مواضيع تستحق وقفة 
.
.
.
رفيف الفارس
.......

 
ـــــــــــــــ
.
.
 svenska
.
مؤسسة آمنة لرعاية الايتام

.

.

..............
 
.
 ................... 


 

....................
جمعية الصداقة العراقية السويدية 
...................

  

ملف مهرجان
النور السابع

 .....................

فيلم عن
د عبد الرضا علي

  




................


خدمات ترجمة 
 في مؤسسة النور

.

 ملف

مهرجان
النور السادس

.

 ملف

مهرجان
النور الخامس

.

تغطية قناة آشور
الفضائية

.

تغطية قناة الفيحاء
في
الناصرية
وسوق الشيوخ
والاهوار

.

تغطية قناة الديار
الفضائية
 

تغطية
الفضائية السومرية

تغطية
قناة الفيحاء في بابل 

ملف مهرجان
النور الرابع للابداع

.

صور من
مهرجان النور الرابع 
 

.

تغطية قناة
الرشيد الفضائية
لمهرجان النور
الرابع للابداع

.

تغطية قناة
آشور الفضائية
لمهرجان النور
الرابع للابداع

 

تغطية قناة
الفيحاء
لمهرجان النور
في بابل

 

ملف مهرجان
النور

الثالث للابداع
2008

ملف
مهرجان النور
الثاني للابداع
 

            


وصايا حبوبتي العلوية !!

أحمد الياسري

الله بالخير  

طبعا خاف عنوان المقالة ياخذ فكركم بعيد والعناوين تكتب ولا تقاس مثل ميكول ابو المثل ،اني عدي حبوبة وحدة (يعني بيبية ،او جدة ) والعلوية حبوبتي الله يرحمها ام ابوي هي الي لحكت عليها ،وام امي ماتت واني زغيرون  وهم الله يرحمها ،،وحبوبابتنا الله يرحم الميتات منهن ويحفظ العدلات بركة اربع وعشرين ساعة لازمات القران ويدعن ،ياربي احفظ فلان وياربي زوج فلانة ،وعلى الفطرة مسكينات وعلى حب الله مثل ميكولون يعني  اذا تعاشرهن متتعلم منهن غير الطيبة ،والعلاقة الطيبة بالله ،، ومن كثر ما مجلبات بالدعاء من الصبح لليل مرات يكًومن يألفن ادعية من خيالهن وتأليفهن اتذكر جنت زغير حبوبتي ام ابوي الله يرحمها ويرحم والديكم حفظتني دعاء اكوله قبل ما انام ،،وكالتلي يحبوبة اذا قريت هذا الدعاء قبل متنام لا تشوف كابوس ولا واحد يبوك بيتك ،اقره هذا الدعاء ونام ومالك شغل ترة الدعاء هذا مجرب ..

كتلها حبوبة علميني شنو هذا الدعاء .؟ كالت كول ثلث مرات (اليعبر السور مكسور   بالله ومحمد وعلي الناطور ) كتلها ادري حبوبة هذا الدعاء وين موجود اول مرة اسمع بهيج دعاء ،،كالت يا  يحبوبة استغفر الله هذا منقول عن اهل البيت وموجود بمفاتيح الجنان ... كتلها ادري حبوبة اني قاري مفاتيح الجنان من الغلاف للغلاف اول مرة اسمع هيج دعاء ..كالت حبوبة كول استغفر الله لا تكفر ..اني هم اخذها على كد عقلها واكولها استغفر الله واظل اقره وياها _اليعبر السور مكسور بالله ومحمد وعلي الناطور _ اكول هاي المرة بركة مادام عدها عقيدة بهاي الكلمات الله ينطيها على كلبها وبالفعل ولله جنت انام مأمن واكعد الصبح الكًة العلوية من الغبشة حاطة قوري الجاي على الجولة ،(يالله ييمة يحمودي اكعد اشربلك استكين جاي ) ،اشرب استكين الجاي بس تكول شارب عسل الجنة مو استكان جاي وفد يوم وصتني حبوبتي كالتلي (( اذا ضاكت بيك الدنيا ذبها على الله ..لأن الدنيا يحبوبة المابيها توكل على الله ما بيها طعم وماصخة )) ،، جان بالعراق كلشي اله طعم ،العلاقة بأهلنا الها طعم ... العلاقة بالجيران الها طعم ..الصداقة الها طعم ،،الاكل ..الهوة الماي ..

وسبحان الله بس عبرنا الحدود العراقية ما ظل شي اله طعم ،،وكأنه الدنيا انكلبت ،،وجنه عايشين بدنيا وعبرنا لدنيا ثانية ماصخة  ..الزلم صارت عبارة عن مكاين ..تفتر من الصبح لليل وتالي افلوسهم تروح لو للقوائم ..لو للتاكس ..هاي اذا يشتغلون على التاكس ..! النسوان تذرع شوارع من الصبح لليل ..حجت فلانة وكالت فلانة .. افلانة عدها بوي فريند ...فلانة اتطلكت واخذت سبع تلالاف من الحكومة ... وزعاطيطنة كلمن مسويلة كصيبة جنها ذيل جلب وحاطلة اربع عفطية ولازملي الماكدنالز ،ذيجة صاحبتي .. وهاي الكيرل فريند مالتي  ..وذيج اوزية ..وهاي جاينيزية ..وذيجه هاف اند فاف ..عود نص ونص ..يرجع للبيت يلكة الاماية تفتر بالشوبنك سنترات والوالد ملتهي  يدفع عرباين ,, لو كلينر ..لو سكيورتي واكف من الصبح لليل حتى يحصلة عشر دولارت كاش ويمشي ويتلفت خاف السنتر لنك يكظونة ..! البنية تجي من المدرسة تشوف كصيبة اخوها وعربانة ابوها وشوبنكً امها ،اتطب لغرفتها لو تلزم المسنجر وتظل جاتنكَ ويه الفريندز ..جاست فريندز ..ّ!! لو كاظة الموبايل وتودي صور وبطايق لصاحباتها ..ومن تجي الاماية تحجي كدامها  كله بالانكليزي عود خاف اهلها يفتهون حجيها ، مو جاست افريندز -عليمن خايفة خاف يكولن عليج صديقاتج  معقدة !! ...بالله بشرفكم هية هاي حياة بيها خير ؟؟ الحياة الي تصير بها الثقة غبـــاء .. والصدك عيب ... والجذب شرف ... وكلمة الحق رصاصة تمرد الجبد ..!! وتمشي وتتلفت ما تدري ياساعة يلدغك صديج

تفتح بيتك لصديق وترحب بيه ثاني يوم  تلكيه يحجي عليك وعلى عائلتك ويطلعك من الكلجية ..! تقدملك خدمة لانسان محتاج ،،من تخلص حاجته يظل يمشي ويشهر بيك ! يعني هاي الحياة اني اشبها(( ابستان اخضر بي الورد والشجر والرياحين .. بس ورة كل شجرة ذيب حاد سنونة عليك ومنتظر بس تتحرك لو حتى ترمش بعينك ..يفزع عليك وياكلك من راسك لرجليك )) ..ارجع لوصية حبوبتي العلوية الله يرحمها (( يحبوبة الدنيا المابيها توكل على الله ماصخة )) حبوبتي ترجمت السعادة بالحياة هي عبارة عن ثقة بالله وتوكل عليه .. على فطرتها وتعتقد ثقة المخلوق بالخالق سبحانه وتعالى راح تخلق ثقة المخلوق بنفسه ..وجانوا اهل كًبل امشيها على هذا القانون الفطري وماشية الامور وياهم  واحنا دوم انكول بسوالفنا واحاديثنا ان اهل كًبل ناس بسيطين واحلامهم على كدهم والحياة جانت حلوة .....

ادري جا الحياة الي جان بيها البغل سيارة ..والجلب سيكيورتي ..والتمر ساندويجة هامبركر.. والماي المقطر من النهر خابط ومتروس جراثيم .!! والحلاق هو الدكتور والمطهرجي والجراح واليشلع سنون ..! ادري جـــا الحياة اللي مابيها لا انترنت ولا فضائيات ولا دي في دي ولا موبايل ولا بي ام دبليو ولا شوبنك سنتر ولا مكدنالز ولا سنتر لنك ،،،ولا ابسط الخدمات هيج سعيدة والناس مرتاحة بيها ... ليش حياتنا رغم وجود هاي الاشياء والخدمات والتطور بيها ماصخة ومابيها خير ؟؟؟؟ واذكر وصية ثانية من وصايا حبوبتي (كتلها فد يوم حبوبة الدنيا تغيرت ..) (كالت يحبوبة شغيرها ..الليل ليل ..والنهار نهار ..والصيف صيف  الدنيا يحبوبة ما تغير بيها شي .. بس البشر تغير يحبوبة مو الدنيا ) وفعلا ولله الدنيا حتى اذا تتطور لو تتخلف ما تتغير .. بس البشر المجلب بهاي الدنيا هو اليتغير ! هوة اليخون ..هوة اليحجي وجهين هوة اليختار يصير قاتل لو مقتول .. هو اليختار يصير شريف لـــو ديوث .. هو اليختار يصير بالحرس الوطني لو بالقاعدة ..هو اليختار يزرع ورد لو عبوات ناسفة ..! الدنيا مالها شغل ..

على اية حال احنا كظينه عمرنا ندرس بالاكاديميات ونقرن للمتنبي وللجواهري وحفظنا حتى كحات ستالين وسوالف ماركس وي زعاطيطة .. خو شكسبير حفظنا مسرحياتة اكثر ما نحفظ اسمائنا ،،بس من ذولة كلهم سمعنا نظريات وحجي ولغوة .. للضالين نظريات من تطبق على الواقع تصير بالمكلوبي ,,فلو مجلبين بركاب حبوباتنا وسامعين حكمهن ووصاياهن وسوالفهن ،،ومشين الحياة مثل ما مشت وياهن شراح يصير يعني ؟؟ راح يكولون علينة جهلة ما مثقفين ؟؟ مو مشكلة خل يكولون جهلة ..ولا يكولون فاشلين وحياتهم تافهة ماصخة مابيها معنى .. حبوبة الف رحمة على روحج اليوم اتذكرتج وكتبت مقالة عليج بجريدة العراقية بسدني لان بزعت روحي من النظريات الخلتني مثل ثور الساكًية بس افتر على روحي وكلشي ما محصل .. اسمك بالحصاد يبو عليوي ومنجلك مكسور ..! انشوفكم العدد الجاي اذا عدلين .

 

أحمد الياسري


التعليقات

الاسم: ahmad alyasiry
التاريخ: 04/08/2008 02:16:09
الف رحمة على امواتك حبيبي شكرا لتعليقك الطيب وانشاء الله على طول شباب تحياتي
اخوك
احمد الياسري
سدني

الاسم: غفار عفراوي
التاريخ: 03/08/2008 17:11:53
الف رحمة على روح حبوبتك
وعاشت ايدك على هاي المقالة
ويا ليت الشباب يعود يوما
واخبرة بالمشيب شعمل بيه




5000