..... 
....
......
مواضيع تستحق وقفة 
.
.
.
رفيف الفارس
.......

 
ـــــــــــــــ
.
.
 svenska
.
مؤسسة آمنة لرعاية الايتام

.

.

..............
 
.
 ................... 


 

....................
جمعية الصداقة العراقية السويدية 
...................

  

ملف مهرجان
النور السابع

 .....................

فيلم عن
د عبد الرضا علي

  




................


خدمات ترجمة 
 في مؤسسة النور

.

 ملف

مهرجان
النور السادس

.

 ملف

مهرجان
النور الخامس

.

تغطية قناة آشور
الفضائية

.

تغطية قناة الفيحاء
في
الناصرية
وسوق الشيوخ
والاهوار

.

تغطية قناة الديار
الفضائية
 

تغطية
الفضائية السومرية

تغطية
قناة الفيحاء في بابل 

ملف مهرجان
النور الرابع للابداع

.

صور من
مهرجان النور الرابع 
 

.

تغطية قناة
الرشيد الفضائية
لمهرجان النور
الرابع للابداع

.

تغطية قناة
آشور الفضائية
لمهرجان النور
الرابع للابداع

 

تغطية قناة
الفيحاء
لمهرجان النور
في بابل

 

ملف مهرجان
النور

الثالث للابداع
2008

ملف
مهرجان النور
الثاني للابداع
 

            


يا اهل الرحم ... وينة اليرحم عماد الطويرجاوي ..!

أحمد الياسري

الله بالخير  

طبعا الصحافة والاعلام العراقي ومنظمات المجتمع المدني خصوصا بعد سقوط النظام اتحدثت عن اغلب شرائح المجتمع العراقي السياسيين والمثقفين والصحفيين والمهجرين والرياضيين والمظلومين والحرامية والمجرمين والشاردين وعلماء الدين ،وهاي المؤسسات اتحدثت عن حقوق وجرائم واختلاسات ومبادرات هاي الشرائح كلها بس اكو شريحة للأن محد جاب طاريها ولا واحد حجه عنها وكأنها عايشه مو بالعراق بالمريخ لو بالمشتري ومحد شايفها ولا واحد عرف ظروفها وهاي الشريحة الي اريد اليوم احجي عن نموذج منها هي شريحة المعوقين العراقيين وبالتحديد معوقين التايهات الي كثروا بالفترة الاخيرة ،وقصدي بمعوقين التايهات همه المساكين الي لا بيها ولا عليها ،يعني يتمشى بشارع السعدون لو بالبياع وانفجرت مففخة لو عبوة ناسفة وطارت عينة لو رجلة لو ايده ،لو اخترع وفقد النطق لو اتخبل وذولة كثروا كلش هواي بعد احتلال عمنه بوش وعمنه ابن لادن وعمنه نجاد العراق ، بحيث يسولفلي ولد صديق من اهل مدينة الصدر في بغداد التقيت بي بسوريا ،يكولي احمد فد يوم جاي من الشغل راجع للبيت وصلت قريب البيت وانفجرت سيارة مفخخة ،فنزلت انقل الجرحى والمصابين يكول ،شلت اثنين مصابين جلب انتباهي واحد منهم كانت رجلة مقطوعة ،يكول يصيح من الالم وبنفس الوقت يكولي لا تحرك السيارة ، فكتله ليش عمي خل الحك اوديك المستشفى كال ما تمشي السيارة اذا ما تجيبولي رجلي !! يكول ويصيح بعلو صوته اريد رجلي ..! يكول فنظرت للمكان شفت رجلين مكطعه هواية ، كلت خل اخذه على كَد  عقلة ((كتله عمي ميخالف بس كلي يا رجل من هاي الرجلين الك ، (اتخيلوا المنظر ) يكول  كالي ذيج ، اشرلي على وحده يكول رحت جبتها ، يكول بعدين افتهمت انه كان يعتقد اذا اخذ رجله للمستشفى راح يرجعوها اله ،فتصوروا وياي شكد اكو ناس بالعراق مثل هذا المسكين ،ومن ينصاب سياسي لو رجل دين تنكلب الدنيا بالعراق والحكومة تلطم والسفارات تستنكر ,, بس للأن ما شفنه واحد استنكر على تعويق انسان عراقي فقير ذنبه انه ما عنده وطن غير العراق وابتلى على عمره من اتمشى بشوارع هذا الوطن حصدته المتفجرات والمليشيات المجاهدة ، والحقيقة السبب الحقيقي وراء كتابتي هذا الموضوع هو انه قبل جم يوم جنت كاعد اتفرج على التلفزيون وبالصدفة درته على قناة البغدادية الي تبث من القاهرة ،وكان طالع برنامج اسمه (ما لا يقال ) والحقيقة افتهمت ان البرنامج يركز على مشاكل العراقيين الي اتعرضوا للسجن او العوق من قبل الامريكان فقط  ،،فعرضوا حالة مواطن عراقي اسمه (عماد ) من اهل طويريج وقصة عماد المسكين انه كان يعيل اطفاله ومرته وخواته وكان يشتغل في بغداد ويجيب الي الله قاسمه للاطفال ،وفي يوم اسود كان عماد راجع الى اهله وبطريق بغداد كربلاء كان اكو رتل دبابات امريكي متعرضين لقصف من قبل مجاميع مسلحة وكام الرتل الامريكي يرمي عشوائي ،والسيارة الي بيها عماد صارت بالنص فرموا الامريكان عليها ومن سوء حظ عماد اجته طلقه بركبته اصابت العمود الفقري وتسببت بأصابته بالشلل الكامل !! يعني لا يحرك ايد ولا رجل بس السانة يتحرك ،وبدة المعاق عماد يسولف سالفته بالتلفزيون والضيم الي شافه بمستشفيات بغداد وكربله بعد ان اتبره منه الاميركان الي همه اساسا مسئولين عن اصابته بس غبر ولد غبر ،هفوه بطلقة عوقته وداروا اوجوهم وراحوا بمكان ما ينقلونه لامريكا يعالجونه ،يسووله معامله طركاعه مثل الاف المرتزقة الي طلعتهم امريكا بحجة مهددين لانهم اشتغلوا مع الامريكان وهمه  اغلبهم كلاوجية وجذابين ،سالفتنا  بدة عماد يشرح قصتة وياريت ما شرح قصتة ولله دمرني ! ولله ما خلاني انام ذيج الليلة للصبح كاعد بالبيت وبس ابجي ،اعترف انه قصة هالانسان العراقي الي لا اعرفه ولا يعرفني دمرتني وخلتني  منثول ودايخ بمئات الاشخاص الي قصصهم مثل عماد المسكين ،واكثر جملة اثرت بيه وبكتني بصدق هية كلمة ابنة من سألة( كاله بابا ليش متكووم تلعب وياية )، الله اكبر ،شنو ذنب علاوي ابن عماد يعيش طفولة معوقة وهو يشوف امه دايخه بالعيشة وتتوسل بالفضائيات بلكي الله يهديلها ولد الحلال ويرحموها ، واب عبارة عن  جثة هامدة عدها لسان وتحجي ،شنو ذنب هالمراة الشابة الي تريد تتمتع بشبابها وهي عايشة تحت كنف زوجها تتحول  بين ليله و ضحاها الى ام واب لزوج مشلول واطفال جوعانين  ،والي اثر بيه اكثر كلام زوجته من كالت (هذاك اليوم كان عماد يصيح فاجيت اركض ،كتله شبيك كال الحكيلي هاي البكة كرصتني وتوجعني كرصتها تكدرين تنشيها عني ) لا اله الا الله ،اتخيلوا واحد من عدكم يكعد الصبح يلكه نفسه ما يكدر ينش ذبانه لو بكة عن جسمه شيصير بيه !!!!! الهي بجاه غربة كل غريب ،بجاه كل دم مقدس جرة على تربة العراق ،وكل روح طاهرة حلقت بسماء العراق ارحمنا يا الهي وخلصنا من لعنة الحروب ،خلصنا من لعنة السلطوية والقتال ،خلصنا من السفلة الي يسكرون بدماء الشعب ، خلصنا ياربي من المجرمين الي مجلبين بركابنا من جيل لجيل ،الهي هاي البلدان داير ما دايرنه حايره بونستها وبفلوسها واحنه من دون الوادم نخلص من مجرم نوكع بيد الف مجرم ، الهي هدي نفوسنا وخلينا نتطهر من لعنة النفاق اواحد يريد ياكل لحم الثاني ،،الهي هذا الشعب مسكين ياربي حتى اذا مرتكب جرم اغضب السماء اغفرلة الجرم هذا وانته ارحم الراحمين ياربي ،، لو اكو غيرك نستغيث بيه ويغيثنا جان ما سكتنا ،وهسه اليوم يا قراءنا واستاذتنا وكتابنا  الكرام ، يا اهل الغيرة والنخوة العراقية ،، ان الله لا يغير ما بقوم حتى يغيروا ما بانفسهم ،، ولازم نخلي ايد بأيد ونتعاون حتى الله يرحمنا ،اخوكم عماد محتاج عملية ، حتى يكدر يمشي مرة ثانية واكو ناس كالوا هاي العملية بامريكا تكلف (65الف دولار) وما اعتقد هذا المبلغ خيالي لو مصيبة مقابل احياء جثة هامدة اسمها(( عماد الطويرجاوي)) ،اسئلكم بتراب العراق الي ماكو اقدس منه بالعالم ان متقصرون عن هذا الشاب المسكين ،يا اهل الرحم ارحموا هذا المظلوم ،الي يكدر يدزلة افلوس ليقصر ، الي يعرف جمعية حقوق انسان استرالية وتكدر تساعد هذا المسكين هم ليقصر ، الي يشتغل بوزارة الهجرة بأي دولة  ويكدر يقدمله معاملة هم ليقصر ، ادري يا جمعيات حقوق الانسان باستراليا وباقي دول العالم  شنو شغلكم بس كاعدين تقشمرون بالحكومات  وتضربون بهالفلوس الحلوة واهلكم بالعراق ضالين بيد المجرمين والحرامية ، ارجوكم يا اخواني لتقصرون هسه لو نلم من كل واحد دولار دولار هم جان سوينه العملية للولد ورجع يمشي، هنيالة اليساعد برسم البسمة مرة ثانية على وجوه اطفال هذا المسكين ، يا جوامعنا ياكنائسنا يا معابدنا يا رجال اديانة يا احزابنا اسئلكم بأنتمائكم للعراق ان متقصرون عن هذا المظلوم ،وخاف واحد يكول هذا كرايب الياسري لو يعرفه ،شهد الله ورسوله ما اعرفه وما حركني لكتابة هاي المقالة غير الحالة الانسانية لهذا المسكين وانه انسان عراقي فقط  ، والي يريد معلومات عن الولد يتصل بينا ننطيه رقم قناة البغدادية برنامج (ما لايقال ) وهمه ينطوه رقمه ويسهلوله الاتصال بعماد ،، يا اهل الرحم لا تقصرون اخوكم عراقي مسكين ولا تقصرون عنه ،خل نساعد ولو عراقي واحد احسن ما نظل نبجي على العراق ، لأن الدموع عمرها ما رجعت ميت ولا موتت حي ، ولله منظر عماد واطفاله يبجي الحجر ،يا اهل الرحم.......وينه اليرحم  عماد الطويرجاوي .

* مدير تحرير جريدة العراقية الصادرة بسدني

أحمد الياسري


التعليقات

الاسم: المخرج . حيدر حامد المحياوي
التاريخ: 04/06/2008 14:27:27
السلام وعليكم اساتذتي الكرام ادعو من الله العزيز القدير ان تكونو بخير وابارك بجهودكم الجباره لمساعدتي لنقل هموم ومعاناة هذا المواطن المنكوب بجراحاته وجراحات وطنه المحتل ليس فقط من الامريكان بل محتل من ابنائه (الخماطه) بين قوسين ارجو ان تبذلو مافي وسعكم لانقاذ هذه الشريحه المعدمه في ارض الرافدين في ارض بابل واشور ارض الحسين وابو الحسنيين
واخيرا اقول لكم سابقى مع الفقراء واقبل ايادي الفقراء واقبل ارجل الفقرءا وادعو من الله ان يحشرني معهم يوم القيامه لانهم احباء الله

ارجو ان تتقبلو مشاركتي البسيطه وحياك الله ياسيد احمد وبارك الله فيك

الاسم: احمد الياسري
التاريخ: 12/05/2008 19:11:25
بارك الله فيك اخي محمد جهد كبير وجبار والاجر انشاء الله عند صاحب الاجر عاشت ايدك وما تقصر انشاء الله

الاسم: مــحــمــد حــســيــن/ مدير مركز الإعلام العراقي في سيدني.. ومدير تحرير موقع شبكة العراق الجديد
التاريخ: 12/05/2008 14:40:31
عزيزي الكريم أحمدالياسري

إتصلت اليوم بقناة البغدادية ، وتحدثت مع الدكتور عبد الحسين شعبان المدير العام للقناة ، كما تحدثت مع السيد داوود سلمان مدير الإدارة والذاتية - مكتب بغداد

وتحدثت مع الاستاذ حيدر المحياوي المخرج الفني والمعد لبرنامج "مالايقال" المهم .. حصلت على رقم هاتف الاخ
عماد صالح جوده ...

إتصلت به اليوم وتكلمت معه ومع زوجته، وطلبت منهم إرسال التقارير الطبية سريعاالى إيميلي الخاص ، لأقوم بدوري بارسالها للاخ الكريم الدكتور أكرم الحمداني - المنتدى الثقافي الطبي العراقي ، لأن الأخير طلبها مني في آخر تواصل معه...

ونحن الآن في إنتظار التقارير الطبية الخاصة بحالة أبو علي (عماد) الصحية.

هذه آخر تطورات ملف الضحية عماد
وانشاء الله سنوافيكم وعلى مركز النور آخر أخبار هذه المهمة الانسانية تباعا.

وقررت مع نفسي أن أراسلك ياعزيزي أحـمـد وانقل لك تطورات هذا الحدث عبر هذا الموقع الموقر لكي يتطلع
علية كتابنا وقرائنا الافاضل ...

ولكي أقول لهم إن هذه المواقع والقنوات الفضائية الاصيلة لها الاثر الايجابي والسلبي على القارىء والمواطن
بشكل عام ، وكل حسب نواياه وأهدافه

نسأل الخالق جل وعلا في أن يسهل قضية عماد
وان يوفقنا جميعا للعمل الخـيـّر

مـحـمـد حـسـيـن
www.aliraqaljded.com

الاسم: احمد الياسري
التاريخ: 12/05/2008 03:18:05
العزيز الاستاذ محمد حسين تحية لك اخي العزيز ومتقصر والله ياريت تتواصل مع الاخوة لمساعدة عماد وصدكني ما اعرفه لعماد وما اعرف تلفونة او عنوانه كل ما اعرفه هو رقم تلفون قناة البغدادية الي طلعت البرنامج وتستطيع ان تأخذ رقم هاتفهم من الموقع مالتهم واسألهم على الحلقة الاخيرة في برنامج ما لايقال والشاب المعوق عماد اعتقد يعرفون عنوانه وكل شي عنه لان اني للان مكدرت احصل عنوانه في الكثير من الاخوة في سدني اتصلوا بية وراسلوني حتى يساعدوه وكتلهم نفس الشي تحيتي لك محمد وشكرا لك
احمد الياسري

الاسم: مــحــمــد حــســيــن/ مدير مركز الإعلام العراقي في سيدني.. ومدير تحرير موقع شبكة العراق الجديد
التاريخ: 11/05/2008 07:46:40


عزيزي أحمد الياسري

هذا أقل مايمكن تقديمه للأخ عماد...

وإنشاء الله سأرسل رسالة خاصة الى الاخوة في المنتدى
الثقافي الطبي العراقي ليقوموا بواجبهم الانساني ،
لإيصال صوتنا الى الجهات المعنية بالأمـر.

الرجاء إرسال عنوان الضحية * عـمـــاد* وصورته
الشخصية ورقم هاتفه الى إميلي الخاص سريعا
والتوكل على الله سبحانه .

وإن أحببت ياعزيزي أحمد:- قـُم أنت بمراسلة موقع ألمنتدى الثقافي الطبي العراقي وأعطيهم كل التفاصيل،
وانا على يقين بأن الاخوة في بغداد سيبذلون كل جهدهم
لمساعدة أخونا عمــاد .

وموقعنا على الشبكة العنكبوتية في خدمة كل أهلنا
داخل وخارج العراق .. ننقل نداءاتهم وشكاويهم
وآرائهم الى من يهمه الأمـر .


مـحـمـد حـسـيـن

مدير مركز الإعلام العراقي في سيدني
مدير تحرير موقع شبكة العراق الجديد
www.aliraqaljded.com


الاسم: احمد الياسري
التاريخ: 11/05/2008 04:18:43
عمي واستاذي الكبير السيد علي الفطبي الموسوي تحية كبيرة لحضرتك ولتعليقك المهم ,اسف لاني لم ابارك لك على تيقنك من انتمائك لأل البيت عليهم السلام لسببين الاول هو انشغالي بمشاغل الحياة وثانيا ايماني بانك من ابناء ابي ذر وعلي وان لم ترتدي العمامة ،قال لي صديقي الدكتور التيجاني السماوي حينمازارني بسدني بانه التقى السيد المرعشي النجفي في قم ،وقال للسيد لقد استبصرت فقال له لقد ردت اليك بصيرتك ولم تستبصر ،فانت يا مولاي علوي البصر والبصيرة انشاء الله ،بالنسبة الى موضوع الشاب عماد الطويرجاوي اشكرك التفاتتك واطلب انا ايضا من الاستاذة وفاء ان لا تقصر مع هذا المسكين ومع كل ابناء شريحة المعوقين في العراق ولنترك جامعي القصور والجزر لجزرهم وقصورهم ،وقد وصلتني رسائل من كتاب تفاعلوا مع دعوتنا في جريدة العراقية لمساعدة عماد وعلى رأسهم الكاتب جوامير مندلاوي المحترم الذي ارسل لي رسالة تضامنية وكتب مقاله بالموضوع والاخ محمد حسين شبكة العراق الجديد الذي اهتم هو بالموضوع ايضا والكثير من السادة الكتاب ياريت اقرا مقالات لمساعدة هذا الشاب العراقي علنا نستطيع ان نرسم بصيص بسمة على وجه اطفاله وزوجته ،وانت المتفضل دائما يا مولاي وانا قلت لسيد احمد الصائغ ان علاقتي بموقع النور كان سببها الاستاذ علي القطبي مشكورا اما بخصوص نظاراتي والحر باستراليا (( الله وكيلك شيخنا هاي الصورة اخذها الي ولد صديق والظاهر عجبت سيد احمد وجلب بيها خويه راح ابدلها والعباس ابو فاضل شيخلصنا من السادة خصوصا ذاك اليوم اتصل بي عمي سيد فيصل الياسري ،كتله الو كالي الو شلونك خوية ابو كلادة ،يعني بين قوسين سويتونه مزق انت وابو ديار خوية راح انشيل الصورة وامرنا لله ،بس انت تدري الشيب من يغزوله راس يكوم يزغر برويحته ويلبس كلايد بلجي الله والحسين يكولون عليه زغيرون ههههههه) تحياتي الك يا مولاي وشكرا على اهتمامك
احمد الياسري سدني

الاسم: علي القطبي الموسوي
التاريخ: 10/05/2008 10:55:08
العزيز الإعلامي الناجح .. أحمد الياسري .. السلام عليكم .. تحية طيبة ..

أشكرك على هذه الإلتفاتة الإنسانية النبيلة العظيمة , وأرجوا أن تصل رسالتك الوطنية الإنسانية النبيلة إلى المسؤولين عن سلب مليارات الدولارات من أموالنا وأموال عماد الطويرجاوي .

عماد الطويرجاوي لا يستطيع ان يدفع ذبابة تلسعه والمسؤولون الأشاوس يقبضون الرواتب من دول اللجوء ومن الخزينة العراقية ومن طرق أخرى لا أريد أن أنزل بمستواي لذكرها والعراقيون يعرفوها أحسن مني ..
يجب أن نطرق على رؤس المسؤولين ليعيدوا بعضاً من حقوقنا المغتصبة المسروقة لنقدمها إلى عماد الطويرجاوي ,و الكثير من أمثال عماد الطويرجاوي .
ليس من العدل والإنصاف أن نستقطع من رواتبنا المحدودة والتي بالكاد تكفي لقوت من يموت , والمسؤولون المدللون في الخضراء وغيرها محتارين أين يضعوا حساباتهم الفلكية , وأي عمارات وعقارات يشترونها في لندن أو في دبي أم في عمان .

ولقد سمعت أخيرأ أن بعض المسؤولين من أصحاب (فرض القانون ) قاموا بشراء جزر في دبي وأبو ظبي , فما عادت تكفي الفلل والشقق والقصور .

أين علي ابن أبي طالب ليقطع أيديهم ؟ أين أبو ذر الغفاري ليضربهم بعصاه ؟ أين عبد الله بن مسعود ليقول : يا عثمان هذه أموال المسلمين وليست أموال أمية وآل مروان .

ختاماً أعتقد أن الأستاذة وفاء عبد الرزاق تعرف بعض المحسنين في الإمارات العربية فتحوا باب العلاج في الإمارات العربية المتحدة ليعالجوا المرضى والعراقيين مجاناً لوجه الله تعالى وسأرسل هذا الطلب على بريدها الان . إن شاء الله تعالى .

ملاحظة عزيزي أحمد الياسري .. مناظرك لو تبدله .. مدري اشلونه .. ولو الحر باستراليا عندكم يتعب العيون .




5000