..... 
....
......
مواضيع تستحق وقفة 
.
......
امجد الدهامات
.......
د.عبد الجبار العبيدي
......
كريم مرزة الاسدي
.

 
.
.
 svenska
.
مؤسسة آمنة لرعاية الايتام

.

.

 

..............
 
.
 ................... 


 

....................
جمعية الصداقة العراقية السويدية 
...................


اطلاق
اسم الشاعر الكبير
 (يحيى السماوي)
على مهرجان النور
الثامن
 

يحيى السماوي  

ملف مهرجان
النور السابع

 .....................

فيلم عن
د عبد الرضا علي

  




................


خدمات ترجمة 
 في مؤسسة النور

.

 ملف

مهرجان
النور السادس

.

 ملف

مهرجان
النور الخامس

.

تغطية قناة آشور
الفضائية

.

تغطية قناة الفيحاء
في
الناصرية
وسوق الشيوخ
والاهوار

.

تغطية قناة الديار
الفضائية
 

تغطية
الفضائية السومرية

تغطية
قناة الفيحاء في بابل 

ملف مهرجان
النور الرابع للابداع

.

صور من
مهرجان النور الرابع 
 

.

تغطية قناة
الرشيد الفضائية
لمهرجان النور
الرابع للابداع

.

تغطية قناة
آشور الفضائية
لمهرجان النور
الرابع للابداع

 

تغطية قناة
الفيحاء
لمهرجان النور
في بابل

 

ملف مهرجان
النور

الثالث للابداع
2008

ملف
مهرجان النور
الثاني للابداع
 

            


مسرحية (لمة شمل )

حميد شاكر الشطري

مسرحية (لمة شمل )

تاليف /حميد شاكر الشطري

شعر /سرحان عاجل 

 

تفتح الستار تدريجيا - الموسيقى تصاحب فتح الستار

المنظر/ دار قديمة البناء جدرانها متشققه - الرطوبة تنخر الجدران لتغور حتى تستقر على جلد طابوق الدار في باحة الدار ابواب لغرف وحمام ومتممات اخرى - الموسيقى تستقر باستقرار واكمال فتح الستار-يجلس رجل كبير السن على كرسي متحرك وسط المسرح وبيده عصا

  

المشهد الاستهلالي (شعر المشهد للمؤلف )

  

الاب /      البيت الطايح مايرحم

             لازم يصلح يترمم 

سعيد وسمير / (معا ) خلي نبيعه

ونخلص منه - مايترمم

امنه /      ياكلب الطاوعكم كلي

              بيه اجدادي اتربوا وهلي

              شيلوا الحقد وخلي يولي

سعاد /     الي يبيعه وين يروح

             عود ايداوي بيه اجروح

              مايدري ايشككه الروح            

              ايزيد اجروح    

              ايضل يرفس دومه المذبوح

              ايضل يرفس دومه المذبوح

سعدون /   خل نتصافه

               خل نتكاتف

                وخلي الماضي يروح ايولي

                بسج يادمعات تهلي

الاب /      البيت الطايح مايرحم

               لازم يصلح يترمم

ابو جمال /  انه اخوكم

               جار الكم صارالي اسنين

               رايد منكم

                 رايد بتكم

مرتي ماتت من اسنين

بكلبي سركم مدفون

ابيوت اتروح وناس اتروح

وتبقه بس الجلمه الطيبه

المه الحلوه

  

(يقسم المسرح الى ثلاثة اقسام الوسط ساحة الدار 00 وعلى اسفل يمين ويسار المسرح 00 هذا التقسيم يستفاد منه مخرج العمل كي يبتعد عن فتح واسدال الستار )

  

الاب / اخ يابه راسي راح ايطك

المجموعه /(شعر عن فقدان الزوج لزوجته )

                                                     

راح 00 راح00 راح

راح اللي تريده الروح منه

راح 00 راح00 راح00  راح

وما حصد غير الالم منه

اشناخذ من نريد الدنيه منه

ما ناخذ تره غير الاذيه

الاب /      ياربي مثل مااخذت ام سعدون اخذ امانتك وريحني

امنه /     (تدخل في نهاية الحديث وتتجه نحو ابيها ) اصمله بويه 00 يومك بعيد       

             انشاله

الاب /      خليني اموت وحدي وارتاح 00 كافي البيه تره مكفيني 00 وجماله فوكاها  هوسة اخوانج 00هسه لو اعرفهم شيردون جان ارتاحيت انه اعرف اله بعد ماتغمض عيني يله ايعرفون قيمة الاب (يصرخ ) ولكم الابو والام خيمه        

  

المجموعه  /

                                       اضل اعتب عليكم طول عمري

                                       واكول الي جره ماجان يجري

                                      نطرت الوفه ماحسبت هجري

                                      وبقه دمعي عله الوجنات يجري

                                     اضل اعتب عليكم طول عمري

  

سمير /     ( في اسفل يسار المسرح ) ايه ماتكلي المن لحمد لحمود ( للجمهور )    خانك عليهن مايمد ايده اتكول بجيبه عكربه افتح  ايدك اشويه  حس كول سمير كبر خاف محتاج خلي انشده

سعيد /    (في الزاويه الاخرى من المسرح ) عمر تفكه خو مو عمر تفكه فك حلكك كول اشمحتاجين ولدي كلش ملصومه فد مره                                  

الاب /         بويه امنه وداعتج العمر مايسوه وهاي الدنيه كلشي ماناخذ منه لامال ولا  عيال

امنه /        العمل الصالح وخامه وزبيل اتراب

ابو جمال /   (في زاوية من المسرح وهو يتحدث مع زوجته ام جمال ) ام جمال انه راح اخطب امنه وبرضاتج وانتي الي وافقتيلي خو موانه                 

  ام جمال /     ابو جمال انه موافقه وانه اروح لامنه واخطبها بنفسي

ابو جمال /      انتي تعبانه مريضه ولازم وحده تجي وياج اساعدج ادير باله عله  الجهال

الاب            /(وسط المسرح ) صيحيلي اخوتج احس بنفسي مختنك اريد اموت

امنه /          اصمله بويه (تنادي اخوتها ) خويه سعدون سمير سعيد تعالوا الحكولي

الثلاثه /       (يدخلون )

سعدون/       ها امنه خوماكو شي بس لاصارعله ابوي شي

سمير /       خو ماصار شي امنه

سعيد/        ها امنه اشبيج

الاب /         انه رايدكم يمي تعالوا  احس بمنيتي كربت واريد اكلكم وصيه وصيه  بالعندي العليه والموعليه        

الثلاثه /       وصيه

الاب /         وصيه بالعندي

الثلاثه /       ايه بويه بالعندك

الاب /         والماعندي

سمير /      (للجمهور )اكيد راح ايكول مطلوب وتعالوا سددوا

سعيد/        (للجمهور )اكيد هسه نطلع مطلوبين عالبيت

سعدون /     بويه عمرك طويل انشاله والتوصي بيه احنه انفذه

الاب /         بويه انه مريض والمرض هتك حيلي ارد اموت

امنه/         اصمله بويه بيه ولا بيك

الاب /        لابويه انتي اشفتي بحياتج من ضيم لضيم الله ايساعد كلبج بويه من يوم     ما انفجرت السيارة الملعونه وانتي كفيتي اعله اخوتج لمن كبرتيهم

سمير وسعيد  / هسه بويه الوصيه

سعدون /       خلينه بالاهم اذا غمضت عين ابوي لاسامح الله منو انه

سمير /        انبيع البيت ونتقاسم كلمن حصته ويذكر صاحبه بخير واحنه ما نكطع    عنكم احنه اخوان

امنه /          يعني نتفلكش هو هذا العقل

سمير /        ايه هو هذا العقل وهذا هو عين الصواب

امنه/        سمير كافي كافي هي ابوي بعده على قيد الحياة وانتم

الاب/        (مقاطعا )اسمعوا وصيتي

سمير وسعيد /   ايه بويه الوصيه الوصيه

سعدون /         انتم اشذبحتونه بالوصيه

سمير /         ايه ليش خاف ابونه مطلوب حته انوفيه

سعيد /        ايه خو مانخلي الوادم اسب بيه

الاب /        انه من اموت محد ايسبني لان انه ما مطلوب بس لرب العالمين

الجميع /      اشلون ( بتعجب )

الاب   /       امنه اختكم ربتكم وتعبت عليكم بعد ماماتت امكم 00 تركت دراستها  ومستقبلها علمودكم 00 اشكد ناس تقدموا الها   

                واخرهم ابو جمال الدلال الي اعتبره واحد من عدنه وكله   علمودكم اريدكم اديرون بالكم عليها بعد ما اموت

سعدون /    بويه امنه بعيونه اختنه وما نفرط بيه 00 هاي عرضنه وشرفنه وتاج عله روسنا                                                                                    

الاب/         بارك الله بيك بويه

امنه/          البركه بيك وبخوتي بويه

الاب/        اسمعوا بويه 00 هذا بيتكم 00 وطنكم ديروا بالكم تتورطون وتبيعونه اذا   محتاج ترميم رمموه 00 تره الموقع البيه تجاري والعين عليه 00 اذا                    اموت بالكم تبيعوه

سمير /      صدك جذب اشلون نبيعه (يلتفت الى سعيد ) سعيد سمعت ابوي شيكول

سعيد /      سمعته ( يلتفت الى الاب ) بويه هذا البيت  بيتنه اشلون نبيعه

  

المجموعه /                   (ابيات شعريه )

                                   ما نبيعك 00 مانبيعك

                                   ياسواد عيونه كلنه نطيعك

                                   ياطفولتنه واهلنه

                                   ياصبحنه ويامسانه وياضهرنه

                                  يالليالي الصيف

                                  يادفو الشته 00 ياورث اهلتنه

                                  مانبيعك 00 مانبيعك

                                  ياسواد عيونه كلنه نطيعك

الاب /        لاتعبوني بالدنيه وبالاخره 00 اريكم شده كصب ما تنكسر

امنه /        اشبيدي عليك بويه سوده بوجهي

 سعدون /      كلشي اللي اتسويه امنه هيه ماخذته من امي وهذا ابونه عمود بيتنه  وخيمه انه 00 اسمعو امنه اختنه00 وهيه وابوي ضحوا بحياتهم    وسوونه زلم                                                                                             

سمير /     سوتك انته مواحنه 00 احنه من زمان زلم

امنه /       اهوايه نسوان احسن من الزلم 00 وهوايه زلم صارت نسوان

سعدون /    اخواني لاتتصورون انفسكم زلم انتم بعدكم ازغار ماتصيرون زلم اله    تنجمعون سوه بحجاية العله

ابو جمال /     ( في زاوية المسرح 00 ام جمال ممتده على بساط ) ام جمال حاجيني موانه احبج شبيدي عليج           

ام جمال /     الدكتور ايكول هنه ايام معدودات 00 ابو جمال دير بالك عله نفسك   لاتخلي نفسك وحيد ازوج 00 ماتفيدك غير امنه هيه لي ادير بالها عليك

  

                                     (دم على الزاويه )

  

امنه  /     ليش هيجي خويه  00 موانه اختكم ولكم هذا ابوي بعده عله قيد الحياة     وانتم بعتوه برخص هو هيجي الله وصه بالوالدين ؟

سعيد /     شو انتي خابصتنه (يمسك ملابسه التي يرنديها ) هنه ذني نفسهن هذا     الطاس وذاك الحمام

 سعدون /  خويه كلشي يهون والفات مات انتي ضحيتي وكفيتي واحنه اليوم لازم    نعوضج كلشي راح منج  

الاب /     عفيه بسعدون حجيك يبني يرد الروح والله ماندمان علربه

سمير /     بويه تره احنه اولادك وكدامك بالكلفات

الاب /     الابن يحترم ابوه واخوه الجبير ويدير باله عله بيته وعياله مويفكر بنفسه  وبس (يلتفت الى امنه)بويه مثل ماوصيتج ديري بالج عله ابو جمال بعد  مااموت سمعتي

امنه/     يومك بعيد= بويه وانشاله مانساها

سعيد /    ابو جمال شنودخله بالموضوع  يابه انته متوهم احنه ماعدنه شي غير الله   وانته

الاب /     انه واثق من ابو جمال هو مفتاح كلبي لاتضيعون المفتاح ويضيع كلشي

سعدون /   والله عيب عليكم حجايه اجيبكم وحجايه توديك 00 لاتصيرون مثل كاروك الجهال شوفوا جيرانكم الله يستر عليهم ماجن  احد بالبيت واحنه مثل    الذبانه اطنطن بالاذن اواحد ياكل واحد ليش ما نعيش بمحبة وسلام واحد    كلبه عالثاني    

امنه /     وفوكه اذا طاح واحد منه كلنه نطيح فوكاه ما انكله صمله ونكومه اعله حيله  ونتجيله

سمير /    سعدون 00 هو احنه لو انته وامنه الي تحجون براس ابوي وكرهتوه بيهوبسعيد

الاب/    لاحجيكم الي تحجوه مومنطقي ما جنكم اخوان من فد بطن ومن فد بيت بويه  اريدكم توعون الدربكم انه مودايم الكم انه    

           احس بيوي قريب (ينادي سعدون بعد ان يختنق ويجد صعوبه في استنشاق    الهواء ) بويه سعدون الحكلي بالبخاخ راح  

           اموت اختنكت ولكم

سعدون /   (صار بويه ) يتجه مسرعا نحو مكان البخاخ )

الاب /     الحك بويه راح اموت (يسقط من الكرسي )

سعدون /   ( يمسك البخاخ ويتجه نحوه )

امنه /       ( تتجه نحو والدها ) بويه اصمله ( تقبله وتحاول رفعه )بويه 00 بويه   (تصرخ )لا لا    

الجميع /    (يتجهون نحو الاب ويرفعونه من الارض ويضعوه في كرسيه سعدون    يدفع الكرسي والجميع خلفه موسيقى حزينه    

             وكانه تشييع جنائزي يخرج الجميع بانتهاء المفطع الاخير من الابوذيه  )

  

                                    

                             راح الي تريده الروح       منه    

                            راح وما حصد غير الالم     منه

                            اشناخذ من نريد الدنيه       منه

                            ولاناخذ تره غير الاذيه

ابو جمال /    ( من زاوية المسرح ويفضل بقعة ضوء )هذا وين صار ياجماعه 00 اذا  انتم محتاجين وماعدكم اتبيعون البيت ؟         

                 (  بتعجب ) ايه موبيتكم موقعه تجاري 00 اروح عليهم للبيت احسن    لاتصير كارثه

                                             (دم )

  

امنه /        (من زاوية المسرح الاخرى ويفضل بقعة ضوء ) جانت عايزه التمت 0 ليش خايبين هاي جزاته انوب عالبيت موهذا  

              بيتنه تربينه بيه اشلون تبيعوه 00 هيجي بسرعه تنسون 00 عفيه زمن   اغبر

                                            (دم )

  

سعدون /    (ينادي ) امنه امنه هاي ويم صرتي ؟

امنه/         (تدخل ) ها خويه بشر

سعدون /    امنه انتي وياي 00 لان ذوله مصرين عالبيع وتوزيع الحصص

امنه /        تحتار بنفسك لوبيه انه الي الله خوش جزاء جازوني بيه بس ارد اكولن جلمه تره البيت عرض وشرف وكرامه

سعدون /    اعرف اعرف امنه

امنه /        جا اشلون يردون نبيعه تردون نبيع ذكرياتنا ونضل ندمانين طول العمر  نتنقل من بيت البيت بالايجارات نرمي بالشارع واحد يتباوع عالثاني                      حالنه حال الزباله ومن انموت تدفنه البلديه اذا اكو عدهه رحمه عود

سمير /      (يدخل صامتا ينظر الى الاثنين

سعيد /       (يدخل صامتا ينظر الى الثلاثه )

                                        (طرقات على الباب )

صوت /     سعدون سعدون

سعدون /    (يتجه نحو الباب يفتحه ) اتفضل ابو جمال اتفضل

ابو جمال /    (يدخل ) السلام عليكم

الجميع /      وعليكم السلام

ابو جمال /    والله جمعتكم حلوه (الى سمير )شنو شو ماجيت بالموعد لازم تريد   اشوف واحد غيري عالبيت ؟

سعدون /     يعني انتم مصرين عله بيعة البيت ماكو مجال للمناقشه

سمير /       اسمعو ياجماعه ابو جمال انطه بيه اعله سعر والسعر خيالي ويكول ابيع   واحد من ولدي واشتريه واحنه مثل مانكول انريد انشوف دربنه    

سعيد /       ايه خو مانبقه ابهاي الحاله ايد وره وايد جدام تره البيت قديم وحيطانه   مايله وعله ياساعه ولنه متبربد علينه واشنقبض بعد

سمير /       وانتم تعرفون ابو جمال عن اب وجد ميسور الحال

ابو جمال /   وسفه صدك كالوا الزمن غدار دير بالك اتامن بيه

امنه /        والحكمه ؟

ابو جمال /   ( مقاطعا )انسه امنه خلي السر الوصاج بيه ابوج ابكلبج مدفون

سعدون /     شنو السالفة ياجماعه شنو سر شنو سالفه امنه ضامه علينه شي ؟

ابو جمال /   الحكمه والسر بوصية ابوكم 00الي خيري هذا من لحم اجتافه

الجميع /     وصيه شنو وخيرك من لحم اجتافه شنو

سمير /       ابو جمال ياوصيه

سعيد /        احنه اريد انبيع البيت ونقبض مالات 00 الوصيه ماتوكل خبز

ابو جمال /    وانه مااشتري البيت اله اسمعون الوصيه

سمير /        ابو جمال 00 مو اتفقنه وحجينه 00 شنو مناه لهناه بدلت

ابو جمال /    وانه اكول البيت ماينباع لمن تسمعون الوصيه

سمير /         انته ياهو مالتك بالبيت ابن عم ابن خال اخو

ابو جمال /     انه ابوكم  واخوكم انه جار والجار اخو عينه عله جاره مويكاطفه حجار  ويدعي عليه 00 لاتسيسون بالماي ولا يغركم  جاري الحجي 00 ترهالجاري القوي ياخكم بعيد 00 اسمعوا راح اقره الوصيه 

صوت الاب /    بسم الله الرحمن الرحيم  اني محمود الحاج كاظم وبكامل قواي العقليه   ان الدار لاتباع ملك جميع اولادي وبنتي وان  الذهب والمبالغ المودعه  والتي تصرف بها جاري ابو جمال هي ايضا ملك لهم واوافق بزواج  امنه من ابو جمال  كهديه على امانته  

ابو جمال /     انه تعرفون رجال اخاف الله وبعد ماماتت زوجتي بقيت وحيد انه   واطفالي واجه اليوم الي ينفع بيه القرش الابيض

الجميع /         (ممطوطه ) اشلون

امنه/            هاي الحكمه وهاي الامانه والوصيه وهذا اللون 00 جربتكم وعرفتكم لكن كل هذا ومسامحتكم لان ابوي جان ايفكر بيكم كل همه انتم 00                         عاش وكل الناس عبالهم بخيل وطماع لكن موبخيل لكونه صاحب تجربه وما جمع هذا المال بالحرام 00 ابوي عاش شريف ومات شريف  وانه الوحيده الي ادري بكل شي بس اريد اشوف وين توصل بيكم لبيت بامنه كلنه   

ابو جمال /     وهاي املاكي وعقاراتي هيه باسم ابوكم مسجله بالطابو وانه اشتغلت بجهدي وتعبي وكفت عله حيلي

سعدون /       لا انته الك حصة ويانه ومن اليوم

الجميع /       انته واحد منه

امنه /          اي ابو جمال انته واحد منه لان هذا الشي مايسويه بس الانسان الطيب  واليحاسبه ضميره

ابو جمال /     ابفضل الله وبفضل المرحوم ابوج  انه مامحتاج منكم فلس واحد

سمير /         جا اذا هيجي انه اريد حصتي لان انه حاس من زمان انتم ماتحبوني   اتكرهوني  اسمعو انه رايح ومن ارجع اريد حصتي  

امنه /        انته امسودن طالع بالمطر والهوى العالي انته ماتشوف حته البيت كام  يهتز    

سمير /       (يدفعها ) وخري ماعليج

سعيد /        انه هم مكروه مثلك اروح وياك

(وفي هذه الاثناء صوت رعد قوي وبريق واضح الحائط يتـأثر بالصوت وتقع منه اتربه ويميل للسقوط 00 تهم امنه والجميع نحو سمير وسعيد لانتشاله من انهيار الحائط 00 يقع ابو جمال على الارض من شدة الدفع  )

امنه /    (تتجه نحو ابو جمال ) ابو جمال خير انشاله (تاخذ بيده وتساعده على النهو ض )      

الجميع /    ابو جمال احنه مدانيين الك

سعدون /     وبما انه الله سبحانه وتعالى دفع عنه الشر علينه ان انفذ الجزء الثاني من الوصيه (الى امنه )امنه شنو رايج بابو جمال يكون زوج الج

امنه /        انه موافقه بزواجي من ابو جمال صحيح هوه اكبر مني لكن كله شهامه  وطيبه

الجميع /     واحنه موافقين

ابو جمال /    اخوان انه اشكركم كلكم وصحيح العوز يخلق مشاكل لكن من المفروض علينه ان نجابها ونصبر والبيت بعد الي شفتوه لازم انفلشه ونوسع بناءه  

الجميع /       ايدنه ابيدك ابو جمال

ابو جمال /      لاتستعجلون البيت موقعه تجاري ومساحته جبيره راح نستغله محلات وشقق سكنيه 00 الشقق والمحلات لاهل المحله وبس 00 وهمه راح يساهمون اويانه كعمال ومجانا لان هاي الكاع هيه مصدر رزقهم حرام ياخذها الغريب   

سمير /         بس مجانا اشلون ؟

ابو جمال /   انه اكلك اشلون 00 جم عائله فقيره نحصي اولادها ونشغلهم عمال للبنايه لان هاي الهم

سعيد /        ماسوينه شي

ابو جمال /      بعد مايكمل البناء يتوزع على العوائل بكذا مبلغ يدفعونه اقساط شهريه

سعدون /       هم احنه مسوين عليهم فضل وهم افلوسنه ومحلاتنه باجر ترجع النه

سمير /         هيج اكعد ابيت واشتغل وازوج

ابو جمال /     ليش لا كل هذا الي تملكونه وماتصيرون

سعدون /       لازم نذكر ابونا خلي نبني جامع اباسمه ونسميه جامع المحبه والسلام  والتبرعات والصدقات مالته تتوزع عله المحتاجين والفقراء

امنه/           اخ لو الحكومه توزع واردات العتبات المقدسه عله العوائل الفقيره  برواتب شهريه اكو بعد كلب ابن كلب يجي ويكول اكو فقير بالعراق   

ابو جمال /    هيه بس العتبات المقدسه اتغرق العراقيين جا النفط اشلون

سعدون /      النفط بله ينشرب شرب وما تحس بيه

امنه /         اشكد حلومن نكعد سوه لمه وحده 00 تدرون محد ايهزنه لا امريكا ولا  ابو امريكا كافي خلي نعيش بمحبه وسلام نتقاسم خبزتنه سوه 00 ايه موالحلم الجنه نحلم بيه حققناه   

سمير /         المحبة والخير والسلام 00 كلمات جنه بس نسمع بيه

سعيد /        اهواي ناس فقدت المحبه والاخوه لكن صك لو كالوا الزمن دوار مايبه  ثابت

ابو جمال /      يله ما دام وكف المطر وهدأت العاصفه الرعديه خلي انخلي ايد بايد انه وياكم نبني ونعمر ونعيش بسلام وامان

المجموعه /     (مقطع مغنىوابمكان استبدال المقاطع الشعريه بافضل منها من اجل رفعة شان العمل  )

  

ايدابايد وجلمه بجلمه

مودوم احنه انظل بالقسمه

خل نتكاتف 00 خل نتعاون

كافي اسلاح وكافي الهاون

خل الايد اتصافح ايد 00 ونضل نكتب من اجديد

هيجي انريد 00 وهيجي نريد

وخل نوفي بكل النكوله

وهلهوله اسابج هلهوله

وموبس 00 بس ننطي مواعيد

خل الايد اتصافح ايد 00ووخل انصير افد حزام 00 احزام وجلمه

نبني نعمر 00 نحجي ابقوه 00 وفد كلمه 00 افد همه

ايد ابايد 00 احجاية زلمه

والمايفهم خل انغهمه

  

امنه /    (للجمهور ) يله اخوان خلي انخلي ايدنا ايدكم من اجل بناء بيتنا 00 محافظتنا عراقنا 00 الي يضمنه كلنه نحافظ عليه للاجيال القادمه

سعدون /     انريد همتكم ويانه  مانريد فقير بالمحله ايمد ايده للغريب تره احنه اهل الانسانيه مو هاي المنظمات الانسانية اتعلمنه الانسانيه والله العراقي                       هوه ابو الانسانيه ومكتنه التزود انذبها عله زياجنه  

سمير/        الله سبحانه وتعالى انطانه عقل حته انفكر بيه والا شنو فرقنا عن الحيوان

سعيد /        ننسه خلا فاتنا ونتركها للزمن هوه كفيل بيها والزمن اثبت انه ذلك

امنه /         وينهم الي نغصوا علينه الخبزه وين الي خلانه حصو وكزاز وي طحين  الكميه كلهم ولوا وراحوا

ابو جمال /     الي شرد ولي تمرض ولي مات انكس موته وراح ينذكر بصفحه سوده اسمه  

الجميع /       مزبلة التاريخ

سعدون /      انتم صافين حافظوا عله صفائكم تره الدنيه مزلاكه وكرسيها كرسي  حلاق وما يدوم لاحد ونريد لمة شمل من صدك وبكلب صافي وخلي كل                    همنه المحبة والاخوه

ابو جمال /     التعاون والسلام

امنه /            الامانه ونكران الذات

سمير /        العراقي غيره وشهامه حته وهوه بالغربه

سعيد/        صحيح الفلوس تغير النفوس 00 بس عمر العراقي مايتغير

الجميع /    صحيح الفلوس تغير النفوس 00 بس عمر العراقي مايتغير

  

(مقطع شعري مغنى يختم به العمل اثناء التحيه )

ياطول الوطن 00 يالمة احباب

  

ياصدك اللبن 00 ياكعدت الباب

  

ياعكد الهوى 00 ياسر الاحباب

  

ياخويه ويداده 00وياهلو ياب

  

لمينه الشمل يالمة احباب

  

لمينه الشمل يالمة احباب

  

(ستار )

حميد شاكر الشطري


التعليقات

الاسم: حميد شاكر الشطري
التاريخ: 19/05/2013 18:08:08
المخترب الدكتور كاظم محمد يوسف
انت معلمي الاول وسرني كثيرا مروركم الطيب على صفحتي اتمنى لك الصحة والعاغية مع الود والمحبة حبيب قلبي

الاسم: كاظم محمد يوسف
التاريخ: 17/05/2013 22:11:02
الودوالمحبة لاستاذي الدكتور حميد شاكر الشطري واتمنى المزيد من رفدنا بمثل هنذه الاعمال الخطابيه مع التقدير

الاسم: حميد شاكر الشطري
التاريخ: 11/05/2013 19:40:08
الاستاذ الباحث الاديب المبدع صباح محسن جاسم مع الود
شكرا لمروركم الطيب على صفحتي وىطراءكم العذب حول النص
استاذي لم يركن هذا النص وانما ماكو للحجي شراي بالناصرية بعد ان تم الاتفاق مع الاستاذ على زغير حول اشتغاله لصالح المنظمه التي يراسها ولكن وبعد ان تم الاتفاق وابرام العقد وتوزيع النصوص على الكادر وبعد ايام جاءني الرد بان هناك عمل جاهر بعنوان (طيور لاتحب الاوسمه )للمخرج احمد موسى وقد ارسلت النص لاحد الاصدقاء في معهد الفنون الجميله في البصره وتم اخراجه من قبل الست فاطمه شاكر فالف شكر لكم وللست فاطمه شاكر ولعميد المعهد زميلى الاستاذ عباس حمدان واسفا للناصرية التي لم تحتضن نتاجات ابناءها مدينة الغرباء تحياتي

الاسم: صباح محسن جاسم
التاريخ: 10/05/2013 19:43:33
"امنه/ اخ لو الحكومه توزع واردات العتبات المقدسه عله العوائل الفقيره برواتب شهريه اكو بعد كلب ابن كلب يجي ويكول اكو فقير بالعراق"
+++++++++++++++++++++++++++

الكاتب المسرحي حميد شاكر الشطري
اهنئك اولا على هذا النص المسرحي الواقعي والرامز الدال.
حبذا لو اخرج مسرحيا لا ان يركن النص على الرفوف.

اتوقع ان اقرأ لك نصوص مسرحية اخرى بمثل هذه الإجادة.


الاسم: حميد شاكر الشطري
التاريخ: 10/05/2013 06:14:06
الاستاذ احمد الصائغ
تحياتي لكم على تلبي طلبي وشكرا جزيلا للاستاذ رفيف للمواصله مع الحب




5000